ഇലക്ട്രയ്ക്ക് ശേഷം ശ്യാമപ്രസാദ് അണിയിച്ചൊരുക്കിയ ചിത്രമാണ് അരികെ. അകലെ എന്ന ചിത്രം കൊണ്ട് ദേശീയ അവാര്‍ഡ് കരസ്ഥമാക്കിയ ശ്യാമപ്രസാദ്, അരികെ കൊണ്ട് ഒന്നും നേടില്ല എന്നത് ഒരു നഗ്നസത്യം. മലയാളത്തിലെ ക്ലാസ് സംവിധായകന്‍ എന്ന അരുമ പേരുള്ളയാളാണ് ശ്യാമപ്രസാദ്. പക്ഷേ, എന്തുചെയ്യാന്‍, അദ്ദേഷത്തിന്റെ ഒരു സിനിമപോലും ഇന്നേവരെ തീയറ്റര്‍ നിറഞ്ഞ് ഓടിയിട്ടുമില്ല. അത് ആരുടെ കുഴപ്പമാണ്. ശ്യാമപ്രസാദിന്റെയോ, അതോ പ്രേക്ഷകന്റെയോ?
എന്നും നല്ല സാഹിത്യകൃതികള്‍ നോക്കി, ചിത്രങ്ങള്‍ ചെയ്ത് പേരെടുത്ത വ്യക്തിയാണ് ശ്യാമപ്രസാദ്. ഇത്തവണയും സുനില്‍ ഗംഗോപാധ്യയുടെ നോവലിനെ ആസ്പദമാക്കിയാണ് അരികെ ചെയ്തിരിക്കുന്നത്. ഒരു ശാന്തനു എന്ന ഒരു റിസര്‍ച്ച് ഫെല്ലോയെ അവതരിപ്പിച്ചിരിക്കുന്നത് ദിലീപാണ്. സ്വല്പം നര്‍മ്മം കൂട്ടിയുള്ള അഭിനയമാണ് ദിലീപിന്റേത്. എങ്കിലും സാധാരണ രീതിയില്‍ നിന്നും കൂടിപ്പോകാതിരിക്കാന്‍ ആവത് ശ്രമിച്ചയാളാണ് ശ്യാമപ്രസാദ്.
വിന്ധ്യനാണ് ചിത്രം നിര്‍മ്മിച്ചിരിക്കുന്നത്. ഔസേപ്പച്ചന്റെ സംഗീതം ചിത്രത്തിന് ഉന്മേഷം നല്‍കുന്നുണ്ട്. പക്ഷേ, കോഴിക്കോടിന്റെ മനോഹാരിത ഒപ്പിയെടുക്കാന്‍ അളഗപ്പനായില്ല. ദിലീപിനെക്കൂടാതെ, മംമ്ത മോഹന്‍ദാസ്, സംവൃത സുനില്‍, ഊര്‍മ്മിള ഉണ്ണി എന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്നു. എല്ലാ തവണത്തേതിലുംനിന്നും വ്യത്യസ്ഥമായി സ്‌പോട്ട് ഡബ്ബിങ് രീതിയാണ് അരികെയില്‍ അവലംബിച്ചിരിക്കുന്നത്. പക്ഷേ, അത് ചിത്രത്തിനെ വളരെ പ്രതികൂലമായാണ് ബാധിച്ചിരിക്കുന്നതെന്ന് ചിത്രം കാണുന്നവര്‍ക്ക് മനസ്സിലാവും.
നിഷ്‌കളങ്കമായ സ്‌നേഹത്തിനെ തേടി നടക്കുന്ന അനുരാധയുടെ ജീവിത വീക്ഷണത്തിലൂടെ പ്രണയത്തിനും സ്‌നേഹത്തിനും പുതിയ തലങ്ങള്‍ അന്വേഷിക്കുകയാണ് അരികെയിലൂടെ. ഇതിനിടയില്‍ പ്രണയത്തെയും സ്‌നേഹത്തിനെയും കേവലം ഒരു വസ്ത്രം മാറുന്ന ലാഘവത്തോടെ കാണുന്ന കഥാപാത്രമായി അനുരാധ. അനുരാധ ഇന്നത്തെ കാലത്തെ പ്രതിനിധീകരിക്കുന്നു. ബന്ധങ്ങള്‍ പലപ്പോഴും യഥാര്‍ത്ഥ സ്‌നേഹത്തിനെ തിരിച്ചറിയുന്നില്ലെന്നും, യഥാര്‍ഥ സ്‌നേഹം എന്താണെന്നുമുള്ള അന്വേഷണമാണ് ഈ ചിത്രം. വിരലിലെണ്ണാവുന്ന പ്രേക്ഷകരുമായി ചിത്രം ഇപ്പോഴും തീയറ്ററുകളില്‍ തട്ടിമുട്ടി ഓടുന്നു.
Comments (0)
Post a Comment