ഡേവിഡ് കാച്ചപ്പള്ളിയുടെ കൈകളിലൂടെ ധാരാളം സൂപ്പര്‍ ഹിറ്റുകള്‍ മലയാള സിനിമയില്‍ പിറന്നിട്ടുണ്ട്. അദ്ദേഹത്തിന്‍റെ പ്രൊഡക്ഷനില്‍ മലയാളത്തിലെ കാരണവന്മാരില്‍ പ്രമുഖനായ സിബി മലയില്‍ സംവിധാനം ചെയ്ത ചിത്രമാണ് ഉന്നം. ഹിന്ദിചിത്രത്തിന്‍റെ സ്‌ക്രിപ്റ്റില്‍ കറന്‍സിയുടെ സംവിധായകനായ സ്വാതി ഭാസ്‌കറാണ് ഇതിന്‍റെ രചന നിര്‍വഹിച്ചിരിക്കുന്നത്.
അജയന്‍ വിന്‍സന്‍റെ ഛായാഗ്രാഹണം വളരെ നന്നായിട്ടുണ്ട്. എടുത്തു പറയത്തക്കതായി ഒന്നുമില്ലെങ്കില്‍ കൂടി സാമാന്യം ഭേദപ്പെട്ട് സബ്ജക്ടിനനുസരിച്ച് ക്യാമറ ചലിപ്പിക്കാന്‍ അദ്ദേഹം ആവത് ശ്രമിച്ചിട്ടുണ്ട്. കുനിയില്‍ പ്രൊഡക്ഷന്‍സ് നിര്‍മ്മിച്ച ഈ ചിത്രം എഡിറ്റിങ് നിര്‍വ്വഹിച്ചത് ബിജിത്ത് ബാലയാണ്. റഫീഖ് അഹമ്മദിന്‍റെ വരികള്‍ക്ക് ജോണ്‍.പി. വര്‍ക്കി സംഗീതം നല്‍കിയിരിക്കുന്നു. ത്യാഗരാജന്‍റെ സ്റ്റണ്ടുകള്‍ സാമാന്യം ഭേദപ്പെട്ടു നില്‍ക്കുന്നുവെന്ന് പറയാം.
ചിത്രത്തില്‍ നല്ലൊരു താരനിരയുണ്ട്. ലാല്‍, ആസിഫ് അലി, ബോളിവുഡിലെ മലയാളി വില്ലന്‍ പ്രശാന്ത് നാരായണന്‍, ശ്രീനിവാസന്‍, ശ്വേതമേനോന്‍, കെ.പി.എസി. ലളിത, നെടുമുടി വേണു....റിമ കല്ലിങ്ങല്‍.. വന്‍ താരനിരകള്‍ ഉള്ള ചിത്രമാണ് ഉന്നം. എന്തായാലും സാറ്റലൈറ്റ് റേറ്റിന്‍റെ കാര്യത്തില്‍ വന്‍താര നിരയുള്ളതിനാല്‍ ഡേവിഡ് കാച്ചപ്പള്ളി രക്ഷപ്പെട്ടുകാണുമെന്ന് നമുക്ക് പ്രതീക്ഷിക്കാം. സിനിമാക്കാരുടെ ഭാഷയില്‍ പറഞ്ഞാല്‍ 'ടേബിള്‍ പ്രോഫിറ്റ്' കിട്ടാവുന്ന ഒരു ചിത്രമാണ് ഉന്നം.
സബ്ജക്ട് അനവധി തവണ അലക്കിയ വിഴുപ്പുതന്നെയാണ്. അതിനെ ഒന്നുകൂടെ നന്നായി അവതരിപ്പിക്കാനുള്ള ശ്രമം നടത്തി എന്നതില്‍ കവിഞ്ഞ് മറ്റൊന്നും ചിത്രത്തിന് അവകാശപ്പെടാനില്ല. എങ്കിലും ചിത്രം കണ്ടിറങ്ങുന്ന പ്രേക്ഷകര്‍ ഒരു ആവറേജ് ചിത്രമെന്ന അഭിപ്രായം പറയാന്‍ ശ്രമിക്കുന്നുണ്ട്.
ചിത്രത്തില്‍ ആസിഫ് അലിയാണ് നായകന്‍. എങ്കിലും ഒരു കുട്ടിത്തം വിടാത്തതുപോലെ നമുക്ക് ചിത്രം കാണുമ്പോള്‍ അനുഭവപ്പെടും. പക്ഷേ, ഹിന്ദി വില്ലനായ പ്രശാന്ത് നാരായണന്‍റെ അഭിനയം ചിത്രത്തിന്‍റെ എടുത്തുപറയത്തക്ക സവിശേഷതയാണ്. പ്രശാന്തിന്‍റെ സ്റ്റൈല്‍, അവതരണരീതി എല്ലാം വാസ്തവത്തില്‍ ഒരു ഹിന്ദിസിനിമയെ വെല്ലുന്ന രീതിയിലായിരുന്നു. റിമ കല്ലിങ്ങല്‍ സാമാന്യം സിനിമകളില്‍ കയറി ഇറങ്ങുന്നതുകൊണ്ട്, കുറച്ചൂടെ ഒതുക്കത്തില്‍ അഭിനയിക്കാന്‍ പഠിച്ചു എന്നത് ഒരു വാസ്തവം മാത്രമാണ്.
Comments (0)
Post a Comment